لواء النسوان

اي والله هاد لواء النسوان عفواً قصدي لواء الإسلام بس شباب الغوطة الشرقية هيك كانو يسمّو هاللواء من كتر التخاذل يعني… طبعاً مع الاحترام الكامل لحقوق النساء بس هون رح اذكر اللش شفتو وسمعتو بحيادية..

هاد لواء الإسلام هو ذاتو اللي مسلتمو زهران علوش اللي عندو حنفية مي قصدي شلال مصاري نازل من السعودية واللي صار عم ينعملو دفش إعلامي كبير جداً بآخر فترة لغاية في نفس يعقوب لا يعلمها إلا ربك.. واللي كبر ولم حوالي كم كتيبة مو لازمين لحدا ولا بيعملو شي وسما حالو جيش الإسلام وعمل الشيخ زهران خالد بن الوليد مدري طارق بن زياد.

المهم هاد اللواء طلع علي صيت لواء النسوان بعد معركة المطار لما انسحب من هنيك وحتى رفض يعطي الذخيرة لباقي المجموعات، لك حتى بيع ما قبل. وطبعاً في عندك قصة معركة جوبر اللي شيخنا كان يتأخر ببعت رجالو هي إذا بعتو وضلت كتير أمور معلقة لأنو هو كان بدو يستلم القيادة وصار في خلافات بينون وبين لواء تحرير الشام تبع فراس البيطار مشان مين يستلم الجبهة. هاد غير باقي المعارك اللي كان ينسحبوا منها وتخاذذلاتون على جبهات جوبر والمعضمية وداريا والقابون وغيراتها.

بعد معركة العتيبة وسيطرة النظام عهالبلدة تسكرت الطرقات اللي عند الجيش الحر وهالحكي ببداية 2013 اجوو اخواتنا بلواء الإسلام يطلعو عالم ويفوتو سلاح وضلو هني المسيطرين الوحيدين عالطرقات وكل مين حاول غيرون يفتح طريق للفوتة أو الطلعة من الغوطة ما قدر.. بس لواء الإسلام قدر.. طلعت كتير إشاعات عن اتفاقات بينو وبين النظام بس ما في شي أكيد، المهم خلال فترة سيطرتو عالطرقات صار يستغل هالشغلة ومثلاً ليطلع شب أو يفوتو عالغوطة بياخد تلاتين ألف ليرة سورية عالراس.

لواء الإسلام طلع مجلة اسمها “مجاهد” وهي مجلة مطبوعة طلع منها عدد واحد “حسب علمي” هالعدد اللي شفتو بعيني هو من أكتر المجلات اللي شفتها خلال هي الثورة تكلفة طباعية وتقديرياً كل نسخة بتطعمي عيلة ليوم واحد عالأقل (ملاحظة: العالم عم تموت من الجوع فعلياً بالغوطة) وطبعاً هالمجلة لتمرير أفكارون للمجتمع.

بهالتدوينة عم حاول أذكر شوي من الشغلات اللي شفتها بعيني أو سمعتها عن لواء الإسلام واللي ما بتنذكر بالإعلام طبعاً ما حكيت شي عن زهران علوش بس لما خلص بحبشة رح احكي عنو لهالزلمة ولما يكون الي مراق. ما عم هاجم ولا عم اطعن بوطنية حدا.. بس في شوية شغلات لازم تنعرف..

لواء الإسلام متل غير تنظيمات ممولة من برا وعندها أجندات غير سورية ولازم ينحطلون حد يوماً ما.. ويفضل يوماً ما قريباً وليس بعيداً….

 

هذه المقالة كُتبت في التصنيف غير مصنف. أضف الرابط الدائم إلى المفضلة.

2 تعليقين على: لواء النسوان

  1. هذا اسمي الحقيقي ولست أكتب بلا اسم
    صفحتك بلا اسم وبلا توثيق = كلام بلا قيمة
    نريد توثيقا للحوادث والتفاصيل لنراجع المعلومات ونقاطعها
    عندئذ تكون وطنيا وإلا
    فأنت من النظام تريد التشويش
    سأراجع هذه المعلومات قدر ماأستطيع وإن كانت معلوماتك خاطئة أو فيها كذب مقصود
    سأطلب من بعض الهكرة إلغاء صفحتك
    حتى لو كتبت عن داعش التي صارت مكشوفة للجميع فلن أقبل اتهامات بلا توثيق
    حتى لو كتبت عن جنود الأسد بلا دليل سأعتبرك مشوشا من النظام
    الحقيقة هي السلاح الأوحد في الثورة

اترك رد