في ذكرى ميلادي

اليوم 28 أيار عيد ميلادي.. والمفروض إني متل كل البشر احتفل بعيد ميلادي.. والمفروض كون مبسوط لأنو عندي كتير إنجازات.. مثلاً اليوم حينعرض فيلم من إخراجي أنا والشهيد باسل شحادة وكمان في كتابي الأول اللي فات عالمطبعة اليوم (هيك خبرني مدير دار النشر).. وغير هيك إني كبرت سنة ميلادية فالمفروض تزيد “حكمتي” وتزيد “خبرتي” بالحياة..

بس..

اليوم ذكرى استشهاد باسل شحادة.. صديقي.. هي الذكرى التانية لاستشهادو ومن يوم اللي راح باسل على عالم تاني بنفس اليوم اللي ولدت في حرمني من اني اقدر احتفل بعيد ميلادي مرة تانية.. لأنو ما بتقدر تفرح بهيك يوم.. لأنو الوجع اللي بقلبك أكبر من إنو يقدر اي فرح يمحي..

بهالسنة الميلادية حاسس حالي أكبر من عمري بكتير.. السواد للي تحت عيوني والملامح وخطوط وشي اللي بتبيني أكبر من عمري بكتير شي بيأذيني من جوا وما فيني احتفل بميلادي وانا عم شوف حالي كيف ما عم اقدر عيش العمر تبعي.. كيف الالم والسواد مسيطر على طرق تفكيري..

اليوم ذكرى ميلادي وما بعرف كيف بدي اتصرف وانا بهالمنفى وحيد وما في حوالي أصدقاء وأهل إلا فيما ندر..

اليوم ذكرى ميلادي وكنت بتمنى لو ما كانو البشر عم يحتفلو بأيام ميلادون..

كمان ما بعرف كيف ممكن الواحد يحتفل بميلادو وفي كل هالقتل والجوع والفقر والتشرد والحروب بالعالم من حوالينا..

يمكن أمنيتي الوحيدة بعيد ميلادي هو إني قضي يوم كامل مع حبيبتي سوا بمكان واحد بدون ما يأثر علينا شي ونكون معزولين عن كل العالم … وليفنى كل شي بعد ذلك..

 

هذه المقالة كُتبت في التصنيف غير مصنف. أضف الرابط الدائم إلى المفضلة.

اترك رد