كلماتي يا كلماتي.. أغنية راب ما تغنت

 كلماتي.. شو صعبة تطلع كلماتي

كلامي أحمر مغمس بالدم

من تمي بخاف تطلع الكلمة

حامل على ظهري جبال من الهَمْ

لمين عم غنّي هالغنيّة؟ لطفل مشرّد بشوارع بيروت؟ لبيوت مهدّمة فوق رُوس صحابها؟ لبيوت عم بتخاف تموت؟

لمين بغني؟ لجيوش عم تقتُل وتموتْ؟ لحدود كلّ شوّي بتتغير؟ لبلاد كل ميّة سنة بتحبْ تموت؟

لشو عم غنّي؟ ومين بيسمع؟ ملايين عم تلعب بالملعب وبالشارع التاني طفل نايم بتابوت. ناس بتغني وبترقص وناس ما بتفيق من نومها إلا لتموت. مُوتْ.. مُوتْ.. مُوتْ.. مُوتي

موتي يا كلماتي

كلماتي يا كلماتي

شو صعبة تطلع كلماتي

كلامي أحمر مغمس بالدم

من تمي بخاف تطلع الكلمة

حامل على ظهري جبال من الهم

كلامي أحمر مغمس بالدم.. دم اللي راحو.. شهدا وأبطال.. خونة وأندال.. الدم دم.. دُمْ دَمْ

شو فرق الغِيابْ؟ منفى تشرد أو موت الأصحاب

شو فرق الغِيابْ؟ منفردة تحت الأرض أو غرفة بأوربا وأنت وحيد.

شو فرق الغِيابْ؟ مخيم بالأردن أو شارع محاصر بالشام.

يا شام

يا شام شو صعبة تطلع كلماتي

لون الدم مغطي الكوكب. وين نحنا؟ نحنا ناطرين النيزك.

يا شام شوفي الدم من أوكرانيا لليمن، برازيل ومصر، عراق وسوريا وافريقيا وكلّ الأمم.

وين ما التفتي يا شام ما في غير الدم والغِيابْ..

يا شام.

يا شام ما بقدر اعتزل هالعالم بجنة عالأرض، ولا فيي كون غَني والناس ممسوحة بالأرض

يا شام ماني مجنون ولا أناني .. كيف ما بلتفت لون الدم قدامي

يا شام يا سامعة الصوت

صوت كلماتي.. شو صعبة تطلع كلماتي

كلامي أحمر مغمس بالدم

من تمي بخاف تطلع الكلمة

حامل على ظهري جبال من الهم

ناس يا ناس

يا ناس اللي بالغربة.. في خربشة على الحيطان.. في شب ضايع بالمنفى، وحدة وقرف تعبان. متل السجن بعيد الوطن عالم دايرة وجنان

ناديت بأعلى الصوت: بدي حدا. رَدْ السكوتْ وقلّي: مُوتْ.

قلّي السكوت: عِيش بوحدتك رسايل عشاق ما بتوصلك.

وجع وضجّة ونافورة مي.

ناديت بأعلى الصوت: يا حلم يا وجع يا طوفان نوح. رد الرّبْ قلّي: مُوت.

قال الولد: الوطن حيّ. مَاتْ الولد، ماتِت المي. ما إجا جواب. ما في إلا المُوت وسْكُوتْ.

يا حلم ضاع يا بواب مسكَرة يا موت.. نادِيتْ ما رَدْ الصُوت.

آه يا كلماتي.. شو صعبة تطلع كلماتي

كلامي أحمر مغمس بالدم

من تمي بخاف تطلع الكلمة

حامل على ظهري جبال من الهم

هذه المقالة كُتبت في التصنيف غير مصنف. أضف الرابط الدائم إلى المفضلة.

تعليق واحد على: كلماتي يا كلماتي.. أغنية راب ما تغنت

  1. Ali Najeh كتب:

    حامل على ظهري جبال من الهم.
    محزنة حيث الحزن واجب
    معبرة حين تعجز الكلمات

اترك رد