أسئلة يحتاج السوريون إجابات لها

هو الشعب السوري عارف طريقه يعني بس في كم سؤال ما عم يعرف جوابون يعني وخولوني بالإجماع إني أكتبون بهالتدوينة… طبعاً بالإجماع يعني شي أربعين مليون واحد بعتولي رسائل وقالولي تعا يا صبي اكتوب.. أربعين مليون باستثناء اللي ماتوا بالثورة واللي ماتوا بالحرب والمعتقلين والشبيحة وجماعة زهران علوش وجماعة النصرة وجماعة داعش وجماعة النصرة غير داعش وجماعة جيش المجاهدين وجماعة الجيش الوطني وجماعة جيش أبو شحاطة وجماعة القصر وجماعة الحرس الثوري وجماعة النظام غير حزب الله وجماعة ضد النظام بس مع نصر الله وجماعة الله والطائفة ووو..الخ. المهم ضل من الشعب السوري  تنين، واحد منون أنا،  قالولي كتوب هالتدوينة.. 

وأنا لسهولة التدوين والكتابة وإنو الواحد يعرف شو هي الأسئلة قررت إني أكتوب الأسئلة بس بدون تعليق عليها وحطها تحت بعض بشكل هيك متل مارح تشوفو تحت.. وطبعاً الأجوبة على هي الأسئلة رح تساعد بشكل كبير بحل المعضلة السورية اللي ربك ما بيحلها يا أخي المواطن..

وها قد بدأنا الأسئلة..

– ميشيل كيلو مع مين؟؟ يعني مع أي جهة بيشتغل؟؟ وشو بدو؟؟

– زهران علوش؟؟

– شو يعني انسحاب تكتيكي؟

– جورج صبرا، وبما إنو الرجل المناسب في المكان المناسب دائماً وأبداً، ايمتا رح يصير مدرب المنتخب السوري؟

– بعد “تحرير” وادي الضيف من قبل جبهة النصرة، إيمتا رح يتم إعلان دولة إسلامية غير دولة داعش بإدلب، وإعلان إدلب عاصمة الدولة التابعة للقاعدة؟

– شو يعني  ‘فيقهة’ الكلمة اللي استخدمها معاذ الخطيب بدعمو لزهران علوش مؤخراً؟؟

– مين اللي خطف النشطاء الأربعة “رزان، سميرة، وائل، ناظم” من دوما؟ وليش؟؟ (هي بنعرف جوابها عالأكيد :3 )

– معاذ الخطيب.. شو بدو؟؟

– مين آدامن صفحة معاليق الثورة؟

– جود عقاد، ماتت حقاً وقامت ولا لأ؟؟

– البلم تبع التهريب بالبحر كم واحد بيساع؟؟

– حزب الجمهورية.. أي جمهورية قصدون؟؟

– عنجد لقمان ديركي شاعر؟

– عنجد عبود سعيد شاعر؟

– كم سوري بقيان ما نشر مقالة بالقدس العربي أو بالحياة؟

– أنا ليش عم أكتب هالتدوينة؟

– شو يعني “تحرير” منطقة ما؟

– بشار الأسد ايمتا رح يسقط؟

– محمد رحال لقى شوفيرية للطيارات تبعو..؟؟ ولسه عندو شواغر؟؟

– جيش التعفيش الوطني ايمت رح يبطل يسرق بيوت؟

– هيثم مناع ليش غاطط؟

– المنبر الديمقراطي.. ليش تشكل وشو عمل وليش فرط؟؟

– شو يعني ..

لما وصلت لهون قررت إني مليت ورح انشر التدوينة هيك وإذا إجا عبالي شي يوم أكتب اسئلة تانية رح اكتبها وإذا لأ فلأ وشكراً.. يلا باي

هذه المقالة كُتبت في التصنيف غير مصنف. أضف الرابط الدائم إلى المفضلة.

اترك رد