يا ريت ارجع طفل؟ لا

كل يوم والتاني بيطلع بوشك حدا حاطط صورتو هو وطفل عالفيس بووك أو على انستغرام أو بمدونتو أو بأي مكان بيقدر علي.. وبيقلك يا ريت ارجع طفل وكانت أحلى أيام وكانت مدري شو ومدري شو.. وغالباً بتكون مترافقة صورتو مع صورة أخو أو أختو أو أمو أو أبو … طبعاً بيكتب جملتو تبع يا ريت ارجع طفل مترافقة مع غزل باللي معو بالصورة إن كان أبو ولا إن كان ابن عمو مو مهم مين الشخص المهم إنو هو اشتاق لهاد الكائن اللي معو بصورة الطفولة..

طيب.. هي ذكرى اللحظة حلوة مزبوط.. ومزبوط إنو حلو الواحد يضلو متذكر الناس اللي كانو معو بهديك الفترة بس هاد البكي عالأطلال مو حلو.. هاد التعلق بالماضي شي سيء كتير.. ما أصلاً نحنا ما بنعرف شي غير إنو نتعلق بالماض الحلو والحاضر البشع.. على طول تاريخنا كمجموع .. يعني الذاكرة الجمعية تبعنا هي دائماً ذكرى ماضي حلو وظريف والحاضر مو حلو والمستقبل مهدد.. إن كان على صعيد الجمع ولا على صعيد الأفراد . لك حتى النشيد الوطني السوري بيقول.. نفوس أباة وماض مجيد… منا الوليد ومنا الرشيد… الخ في أسخف من هيك؟؟

هاد التعلق الأهبل بالماضي بحسو شي مرضي.. لأنو مو رضيانين عن حياتنا الحالية ولأنو مو قدرانين نغير شي فبنرجع لأيام الطقولة والبراءة.. طبعاً الطفولة شي كيتر حلوة بغض النظر عن أمراضنا..

أنا من ناحية شخصية بكره ماضي الطفولة تبعي.. لأنو ما بيذكرني غير بالفقر وبمدرسة البعث وبالصدرية المدرسية وبعنصر الأمن اللي بدو يجي يحقق عنا بالبيت كلما اجا عبالو للضابط.. بيذكرني لما كنت امسك ايد ستي ووقف عدور المؤسسة بالبرد أو بالشوب مو مهم المهم توقف بالشارع وتستنى دورك لتأخد سكر ورز وسمنة وحليب… الخ.. طفولتي بتذكرني بموظف الكهربا اللي بيجي بيفحص العدادات وهو عم يشر عرق..

ما بعرف ليش لما بتذكر طفولتي أول شي بيخطر ببالي هو العاصفة الرملية أو اللي كنا نسميها بالقامشلي العجاج.. هاد او شي بيخطر لما بتذكر الماضي المجيد.. وكمان يمكن بتذكر المدرسة ورتلاً ترادف..

عكل حال هي صورة من صور طفولتي.. شايفين ما أحلى هديك الأيام .. بس تنذكر وما تنعاد..

164397_424756104283289_83938157_n - Copy

هذه المقالة كُتبت في التصنيف غير مصنف. أضف الرابط الدائم إلى المفضلة.

اترك رد